السلام عليكم ورحمة الله وبركاته
هى قصة ومش قصة
هو حوار ومش حوار
هى حدوتة ومش حدوتة
هو قرار ومش قرار
بصراحة مش عارفة هو ايه؟
اسيبكم انتوا تقروا وتحكموا عليه
يلا بينا نبدأ
مستعدين
على بركة الله يلا
ترن ترن ترن
كريم:الو ازيك يا مرمر
ملك الحساب:سيئة عشان دلعتها وقولت لها يامرمر
أميرة:انا بخير يا كيمو
ملك الحساب:سيئة عشان دلعتيه وقولتى له ياكيمو
كريم:وحشتينى مووووووووووت
ملك الحساب:سيئة عشان قولت لها وحشتينى
اميرة:وانت كمان والله
ملك الحساب:سيئة عشان قولتى وانت كمان
كريم:ثوانى ياروحى الباب بيخبط
هقفل واروح اشوف مين
ملك الحساب:سيئة عشان قولت لها ياروحى
كريم راح يفتح الباب ملقاش حد عالباب
ولكن فجأة سمع صوت بيقوله
انا ملك الحساب
عاوز ابلغك بعدد السيئات اللى انت ارتكبتها
فى دقيقة واحدة فى مكالمة تليفون
عدد السيئات=عشرة سيئات
كريم:معقول انا اخدت عشر سيئات فى دقيقة واحدة؟
والله ده ظلم انا مظلوم يا بيه انا برئ
ملك الحساب:اناا بلغتك يا كريم وانت حر
وافتكر ان انت فى شهر رمضان شهر الطاعة والقران
وليس شهر الكلام والهزار
واكيد دلوقت الشيطان فرحان بيك
:W :##:
كريم:يلهوى ده انا نسيت انى فى رمضان
خلاص انا هاخد بالى من كلامى من هنا واريح يا ملك الحساب انا مش ناقص ذنوب هى الذنوب دى ورايا وارايا
ده انا ماصدقت يجى رمضان عشان الواحد يستغفر ربنا شويتين وياخد له كام حسنة
ترن ترن ترن
أميرة:ايه يا كيمو الغياب ده كله ساعة بحالها بتفتح الباب
ملك الحساب:سيئة عشان الامورة دلعتك
كريم:والنبى ماتقولى لى ياكيمو تانى
أميرة:هههههههههه خلاص هقولك ياكرملة
ملك الحساب:سيئة عشان الامورة ضحكت وانت سمعت صوت ضحكتها وصوت المرأة عورة
كريم:والنبى ما تضحكى تانى يا أميرة
وبلاش كرملة ولا بنبونى
أميرة:فى حد شايفك وانت بتكلمنى ياروحى
ملك الحساب:سيئة عشان الكتكوتة قالت لك ياروحى
كريم:لا والله مفيش لاحد ولاسبت
ملك الحساب:سيئة عشان انت حلفت وقولت والله ما حد شايفنى ونسيت ان ربنا شايفك
أميرة:أومال مالك كلامك ناشف كده ليه؟
كريم:لحظة واحدة يامشيرة قصدى يا اميرة
ممكن ياعم يابتاع الحساب توقف العد شوية
كفاية سيئات بقى
ملك الحساب:وأنامالى هو انا اللى بكلم أميرة ولا انت
أميرة:مين مشيرة دى وبعدين حساب ايه وبتاع يا ياكريم انت بتخرف بتقول ايه؟
انت بتتكلم مع حد تانى غيرى يعنى مش فاضى لى
كريم:لا والله أنا فاضى
ملك الحساب:سيئة عشان حلفت انك فاضى وللأسف انت مش فاضى انت المفروض تروح تصلى العصر
عشان انت سهيت فى المكالمة ونسيت الصلاة
أميرة:لا والله انت مش كريم مش ممكن تكون كريم حبيبى اللى انا عرفته
ملك الحساب:سيئتان عشان حلفت وقالت انك مش كريم وانت كريم وسيئة كمان عشان قالت كلمة حبيبى
كريم:ابوس ايدك كفاية سيئات انا اتخنقت خلاص
أميرة:اتخنقت منى ياكريم
كريم: والله ما اقدر اتخنق منك ياروحى لالالاقصدى مش ياروحى
ملك الحساب:سيئة عشان قولت لها ياروحى
كريم:والله يا ملك الحساب انا افتكرت وصلحت الكلمة خلاص
أميرة:والله انت اكيد اتجننت ياكريم
ملك الحساب:سيئتين عشان هى حلفت وقالت انك اتجننت وانت لسه عاقل وسيئة اخرى عشان قالت لك حبيبى
كريم:أميرة حببتى يووووووووه قصدى مش حببتى
ملك الحساب:سيئة عشان قولت لها ياحببتى
ومفيش حاجة اسمها رجعت فى كلامى وصلحتها
الكلمة طلعت خلاص
أميرة:باى ياكريم ومتحاولش تتصل بيا تانى سلام
كريم:استنى ياروحى ولا اقولك روحى متنستنيش
ملك الحساب:سيئة عشان قولت لها ياروحى
بعد المكالمة
كريم:صدق اللى قال جه يكحلها عماها وياريت انا عميتها وبس ده انا ضيعتها خالص وكمان اخدت سيئات
ملهاش عدد وكل ده فى خمس دقايق
أعمل أيه بس ياربى؟؟
ملك الحساب:ما تقول لها الحقيقة
كريم:حقيقة ايه؟؟
ملك الحساب:خليك شجاع وروح قولها يا أميرة مش هينفع أكلمك تانى فى رمضان عشان انا باخد ذنوب كل ما اكلمك
كريم:المشكلة ان اميرة هتفهمنى غلط وتقولى انى مش بحبها
والكلام ده
ملك الحساب:طيب هسألك سؤال
انت بتحب ربنا اكتر ولا اميرة
كريم:ربنا طبعااااااااااااا
انا بحب ربنا فوق كل شئ
ملك الحساب:خلاص انت كده حليت المشكلة
ياروميو روح قول لها واشرح لها انك بتحب ربنا اكتر منها
وهى لو بتحب ربنا زي انت ما بتحبه اكيد هتفهمك وتوافق
انكم متتكلموش تانى فى رمضان
كريم:طيب ادينى مهلة كام يوم عشان افكر
ملك الحساب:مفيش وقت خلاص عشان تفكر
ده انت لو قعدت كام يوم تفكر هيكون رمضان خلص
وبدل ما تخرج من رمضان بالحسنات هتخرج وانت شايل سيئات
كريم:عارف ايه المشكلة يا ملك الحساب
ملك الحساب:ايه؟؟؟
كريم:ان انت كل كلامك صح وانا مش عارف اغلطك
ملك الحساب:لازم كلامى يكون صح
لأن الكلام ده ربنا امر بيه وانا ببلغك بيه
عشان لما تتحاسب يوم القيامة تبقى فاكر انى بلغتك
كريم:طيب انا رايح اتصل واقول لها
الموبايل:عفوا لقد نفذ رصيدكم يرجى اعادة شحن البطاقة
كريم:ياااااااااه ياخسارة ضيعت الرصيد فى الذنوب
وهنزل دلوقت اشترى كارت شحن تانى
فعلا الغلط بفلوس مش ببلاش
بعد ما كريم اشترى الكارت
ترن ترن ترن
ترن ترن ترن
أميرة بتتقل ومش عاوزة ترد
ال يعنى عاملة نفسها زعلانة
كريم:هبعت رسالة وامرى لله
رسالةردى يا اميرة عشان عاوزك ضرورى)
أميرة:خير ياكريم فى ايه؟
كريم:اول حاجة ياريت متكونيش زعلانة منى
عشان احنا فى شهر رمضان وفى ايام مفترجة
وجميلة ومينفعش حد يزعل من حد
أميرة:اناعمرى ما زعلت منك ابدا ياكريم
ولا بعرف ازعل منك اساسا
كريم:طيب انا عاوز اقولك كلمتين يا أميرة
يا طيبة ياأميرة بصراحة احنا مش هينفع نتكلم تانى
فى رمضان عشان ده شهر صوم وعبادة واستغفار
واوعى تقولى انى مبحبكيش
لان ربنا وحده العالم باللى جوه كل انسان
بس انا بحب ربنا اكتر منك يا اميرة
واكيد انتى كمان بتحبى ربنا اكتر منى
وعشان احنا بنحب ربنا يبقى لازم نقرب منه
فى الشهر الكريم ده
أميرة:بصراحة مش عارفة اقولك ايه انت
احرجتنى بكلامك ياكريم
ربنا يكرمك ويهديك كمان وكمان
كريم:طيب مع السلامة بقى عشان انا قايم اصلى العصر
اكلمك فى العيد ان شاء الله
وكل سنة وانتى طيبة ورمضان كريم
أميرة:على طول كده طب خليك شوية
كريم:انا ممكن استنى لكن صلاة العصر مش هتستنى
مع السلامة
لا إله الا الله
أميرة:محمد رسول الله
ملحوظة هامة
ملك الحساب ده مكنش ملك الحساب ولا حاجة
ولكنه كان ضمير كريم
وتوتة توتة فرغت الحدوتة
ولا فرغت المكالمة ولا فرغت القصة
مش عارفة بقى هى ايه ؟؟
بس بجد اتمنى ان كل واحد منا يكون استفاد
اى حاجة وياريت تحاول تعمل زى
كريم وأميرة
اسيبكم بقى دلوقت ألا المغرب تكون اذنت
ومعاد الفطار يفوتنى
وانتوا عارفين الغايب ملوش نايب
واحنا شكلنا طابخين النهاردة فراخ
بس على فكره القصه دى متالفه بس اتمنى طبعا تعملوا زيهم فعلا حتى لو فى رمضان
لكن طبعا اتمنى لو بعد رمضان ونتجه لربنا اكثر
موضوع: محتار أعمل ايه مع (الجيرل فريند)بتاعتى فى رمضان!! .. 
الثلاثاء 8 سبتمبر - 18:00
[/size]
